Tuesday, August 28, 2007

مين اللى بيحدف طوب ؟

الراجل ده نزل الشارع فى أمريكا و سأل الناس أسئلة عادية جدا عشان يثبت للعالم ان الشعب الأمريكى مش بس مش مثقف وما يعرفش حاجة عن العالم لأ ده غبى فعلا و عنده استعداد يدعم رئيسه فى حرب على دولة هو ما يعرفش مكانها على الخريطة .
نماذج من الاجابات للى مش لاقط ..
دولة بتبدأ بحرف ال u ؟
يوتوبيا
يوتاه ( ولاية فى أمريكا )
يوغوسلافيا
المثلث ليه كام ضلع ؟
اللعنة .. 4
مالوش أضلاع .. ليه ضلع واحد ؟
سور برليييييييييين فين ؟
....
القدس
القدس
....
_ KFC نشأ فين ؟
_ KFC بتاع الفراخ ؟
_ أيوة
_ مش عارف الصراحة
_ طب انت عارف KFC اختصار ايه ؟
_ أيوة .. دجاج كنتاكى المقلى
ديانة اسرائيل ايه ؟
مسلمين
اسلام
كاثوليك
ايه هى الدول اللى فى محور الشر ؟
كاليفورنيا
مسسيبى
فيلم حرب الكواكب مستوحى من قصة حقيقية .. صح ولا غلط ؟
صح
صح
كوفى عنان .. مشروب ؟
صح
من هو تونى بلير ؟
ممثل
من هو فيدل كاسترو ؟
مغنى
فى سؤال بقى بيطرح نفسه , الراجل ده واضح من لكنته انه مش أمريكانى , غالبا انجليزى أو أسترالى , ايه اللى خللى الراجل ده يتعب نفسه و يسافر أمريكا عشان يعمل كدة و ماخلاش حد مننا احنا نعمل كدة ؟
الاجابة فى البوسط القادم !

16 comments:

iHaB said...

بص يا قنديل فيه فرق بين عدائية بين اوربا وامريكا ككتلتين غربيتين وبين عدائية بين اوربا وامريكا وبينا ..بمعنى ان العالم عنصرى ومش حيادى ونفس المذيع ده ممكن يعمل فيلم تسجيلى عن همجية الشيعة فى العراق فى احتفاليتهم بالكربلائيات ..واد ايه هما متخلفين ووثنيين ..اوربا وامريكا فى مركب واحد ..السؤال ..احنا مين معانا فى نفس المركب ؟

iHaB said...

آه صحيح ..خدت بالك من عدد الملونين فى التقرير ده ..وطريقة اخراج لقطاتهم ؟

محمد ثروت الجابري said...

فيلم اسمه
6 دقايق
اتعمل بنفس الفكرة بس مع العرب
والإجابات كانت مذهلة
والمخرج بني فكرته إن معدل قراءة العربي بتكون
6 دقايق
في السنة


الفيلم هنا

http://www.20at.com/newArticle.php?sid=2768

qindeel said...

بس الفيلم العربى كانت أسئلته فعلا محتاجة ثقافة على العكس من أسئلة الأمريكان

Mohamed said...

انا شوفت الفيديو ده بس السؤال اللي سألته لنفسي بعد ما خلص: "طب وبعدين؟!!"
ما نبقاش مثقفين احنا كمان بقى ما دام الأمريكان مش مثقفين؟!!

ردا على السؤال أسفل عنوان المدونة:
"الساعة خمسة وانت داخل على ايدك الشمال" P:

MOODY said...

بص يا قن قن
هو واضح من الكليب ان الراجل بيحاول يثبت ان الشعب الامريكى اللى صوت و قال يا داهوتىىىىىىى لصالح الحرب..جاهل و ما يعرفش حاجة و يتضحك عليه, لفت نظرى السؤال بتاع لو الرئيس هيحارب كذاكستان انت هتوافق؟ بالرغم من انهم فى السؤال بتاع تعرف كذاكستان؟ قالو لأ..قالو موافقين لمجرد ان بوش قال:اذن هى الحرب

انى ضد العاولامى..انى ضد العاولامى

علوة said...

بالصلاة ع الحبيب

على فكرة كل شخص في الفيلم ده ليه شبيه في كل محافظة من محافظات مصر

يعني هتلاقي واحد شكله مدي على دقهلية وواحد المنيا وواحد بركة السبع وهكذا

حلو يا قنديل
وألف شكر على حوار البريد
الفلوس اللي انت بعتهالي
ال 200 جنيه يا بني
بتوع المرتب
خلاص خلاص فضحتنا

علوة said...

سلام عليكم

الله يخليك يزيد فضلك

تامر said...

للدهشة:ـ
الأمريكان عندهم كلية واحد
استراليا بقت فرنسا وإيران
القاعدة مقرها إسرائيل ورئيسهاياسر عرفات، والراجل مصمم وبيقول: ـ
"every body know that!!"
والراجل الأخراني اختصر وقالك احنا مع بوش وهوه عارف هوه بيعمل إيه لإنه من تكساس
طبعا بدون فذلكة، شعب أمريكا اللي اللقاءات جابت نماذج منهم ملونين وبيض سطحيين وجهلة ومدَّعين، وده لا يتناسب مع الصورة اللي إعلامهم بيروجها عنهم، عشان نعرف إن الإعلان مش بس بيصدر أفكار غاط عننا ليهم، كمان بيعمل العكس
ده الواحد يروح أمريكا يا عم ويعمل شغل لوز على قفاهم، ونعمل فيلم خيال علمي عن بني آدم عنده كليتين

تامر said...

طبعا ما با عممش، أكيد فيه أمريكان عندهم الحد الأدنى من الثقافة، ومثقفين نص نص، ومثقفين، واحنا مش أفضل حالا، بس الحقيقة، إني شايف إن الإمبراطورية العظيمة دي مليانة هوا، وخلال تلاتين سنة بالكتير هتبدأ تنهار

qindeel said...

هههههههههههههههههههههه

جامد موضوع فيلم الخيال العلمى بتاع أبو كليتين ده

Eman said...

Unfortunately the video has been removed from Youtube. But I get the main theme, and I think I might've seen something like it before.
I agree with Tamer about the Media part; fake fake fake! lol

Rbna yostor 3leina w 3la l agyal l qadema b2a :D

Entrümpelung wien said...

شكرا على الموضوع ..))

entrümpelung wien said...

شكرا على الموضوع
entrümpelung
entrümpelung
entrümpelung wien

Bookmarks said...

تسلم ايديك على الموضوع المتميز جداا
delogierung-delogierung
Wohnungsräumung
zwangsräumung-zwangsräumung

Umzug said...

بسم الله الرحمن الرحيم .. لا اله الا الله
Umzug - Umzug wien